Poliplər endometriumdan (uşaqlığın daxili səthi) inkişaf edib uşaqlıq boşluğuna doğru uzanan patoloji törəmədir. Onlar endometriumun hər hansı bir nahiyəsinin qalınlaşması və normadan artıq böyüməsi sayəsində meydana çıxırlar. Poliplər tək və ya çoxsaylı olmaqla uşaqlığın müxtəlif nahiyələrində yerləşə bilər. Ən çox uşaqlıq dibi və boru uclarında yerləşirlər. Ölçüsü bir neçə ml.-dən bir neçə sm.-ə qədər olur. Poliplər ya incə ayaqcıq, ya da qalın əsasla endometriuma bağlanırlar. Bəzən isə, ayaqcıq o qədər uzun olur ki, polip boşluqdan uşaqlıq yoluna sallanır. Hər yaşda qadında meydana çıxa bilər, ancaq ən çox 40-50 yaşlı qadınlar arasında müşahidə olunur.